Politika e privatësisë

Kush i përpunon të dhënat

Kontrolluesi i të dhënave tuaja është Besa, me seli në Tiranë, Shqipëri. I përpunojmë të dhënat sipas legjislacionit shqiptar për mbrojtjen e të dhënave personale dhe, kur zbatohet, sipas Rregullores së Përgjithshme për Mbrojtjen e të Dhënave të BE-së (GDPR). Për çdo pyetje rreth privatësisë na shkruani nga faqja e kontaktit.

Parimi ynë

Besa nuk ka profile publike. Askush nuk mund t'ju kërkojë ose t'ju shfletojë. Profilin tuaj e shohin vetëm personat që ju propozohen, dhe kontaktet vetëm ata me të cilët keni thënë po të dy. Nuk shesim të dhëna dhe nuk shfaqim reklama.

Të dhënat që mbledhim

Çfarë	Shembuj
Llogaria	numri i telefonit, emaili, gjinia, deklaratat (18+, jo i martuar, "Jap besën") me datën dhe versionin e kushteve
Profili	emri dhe mbiemri, datëlindja, vendbanimi, vendlindja, gjatësia, gjuhët, arsimi, puna, intervali i të ardhurave, gjendja civile, fëmijët, planet, personaliteti, interesat, teksti "Me fjalët tuaja"
Besimi	vetëm nëse zgjidhni ta jepni; mund të zgjidhni "Nuk dua ta them"
Media	fotot dhe videoja prezantuese
Preferencat	kush kërkoni dhe sa rëndësi ka secili kriter
Kontaktet	kanalet në numrin tuaj, emaili nëse zgjidhni ta ndani, Instagram, preferenca për kontaktin e parë
Aktiviteti	propozimet, përgjigjet tuaja dhe arsyet private të një "jo", lidhjet dhe faza e tyre që e shihni vetëm ju
Pagesat	shuma, data, mënyra e pagesës, fatura; të dhënat e kartës i përpunon vetëm Stripe
Siguria	raportimet, provat që ngarkoni, bllokimet, vendimet e ekipit
Teknike	kodet e hyrjes, adresa IP dhe regjistrat e sigurisë, abonimet për njoftime

Pse i përdorim dhe mbi çfarë baze

• Për të ofruar shërbimin (kontrata): llogaria, profili, llogaritja e përputhjes, propozimet, shkëmbimi i kontakteve, njoftimet dhe pagesa.
• Me pëlqimin tuaj të shprehur: besimi dhe të dhënat e tjera të ndjeshme që zgjidhni t'i jepni. Mund ta tërhiqni pëlqimin kur të doni duke e hequr të dhënën nga profili.
• Për sigurinë e anëtarëve (interes legjitim): shqyrtimi i profileve, zbulimi i llogarive të dyfishta, trajtimi i raportimeve dhe mbrojtja nga mashtrimi.
• Për detyrime ligjore: faturat dhe të dhënat e pagesave që kërkon ligji tatimor.

Përputhjen e llogarisim automatikisht nga përgjigjet tuaja, por çdo profil miratohet nga një njeri. Asnjë vendim për pranimin ose pezullimin e një anëtari nuk merret vetëm nga makina.

Kush i sheh të dhënat

Kush	Çfarë sheh
Personat që ju propozohen	emrin, moshën, punën, qytetin, vendin, vendlindjen, foton kryesore, videon, tekstin dhe faktet e profilit; fotot e tjera sipas zgjedhjes suaj; të ardhurat vetëm si interval dhe vetëm nëse e lejoni
Lidhjet, pas një po të ndërsjellë	mbiemrin, telefonin, kanalet, Instagram, preferencën për kontaktin e parë dhe emailin nëse e ndani
Ekipi i Besës	atë që duhet për shqyrtimin, pagesat dhe raportimet; çdo herë që një anëtar i ekipit hap kontaktet ose videon tuaj, regjistrohen emri i tij dhe arsyeja
Askush	datëlindjen e saktë, shumën e të ardhurave, përgjigjen tuaj kur është "jo", identitetin e kujt ju raporton

Ofruesit që na ndihmojnë

I ndajmë të dhënat vetëm me ofrues që përpunojnë për llogarinë tonë dhe sipas udhëzimeve tona: strehimi i serverëve dhe ruajtja e fotove e videove në Bashkimin Evropian, Stripe për pagesat me kartë, ofruesi i SMS-ve dhe telefonatave për kodet e hyrjes, ofruesi i emailit dhe shërbimet e njoftimeve të shfletuesit. Nuk i transferojmë të dhënat jashtë BE-së dhe Shqipërisë, përveç rasteve kur një ofrues e bën këtë me garancitë që kërkon ligji.

Sa kohë i ruajmë

• Llogaria aktive: sa kohë jeni anëtar.
• Pa rinovim: profili fshihet nga propozimet më 1 janar dhe arkivohet pas afatit të caktuar (31 ditë si parazgjedhje).
• "E gjeta personin" ose mbyllja e llogarisë: 30 ditë, që të mund të ktheheni; pas kësaj të dhënat fshihen.
• Fshirja e menjëhershme: profili, fotot dhe videoja fshihen menjëherë.
• Raportimet: 3 vjet nga mbyllja e rastit, për sigurinë e anëtarëve të tjerë.
• Pagesat dhe faturat: aq sa kërkon ligji tatimor.
• Kodet e hyrjes: skadojnë pas 10 minutash dhe fshihen rregullisht.

Të drejtat tuaja

Keni të drejtë të kërkoni qasje në të dhënat tuaja, korrigjimin, fshirjen, kufizimin e përpunimit, transferimin e tyre dhe të kundërshtoni përpunimin që bazohet në interes legjitim. Shumicën e të dhënave mund t'i ndryshoni vetë nga profili, dhe mund të shkarkoni një kopje të të dhënave tuaja nga aplikacioni. Për kërkesat e tjera na shkruani; përgjigjemi brenda 30 ditëve.

Nëse mendoni se nuk i kemi trajtuar mirë të dhënat tuaja, keni të drejtë të ankoheni te Komisioneri për të Drejtën e Informimit dhe Mbrojtjen e të Dhënave Personale ose tek autoriteti mbikëqyrës i vendit ku jetoni.

Siguria

Të dhënat ruhen të enkriptuara gjatë transmetimit. Fotot dhe videot ruhen në hapësirë private dhe jepen vetëm përmes lidhjeve që skadojnë pas pak minutash. Ekipi hyn në panel me fjalëkalim dhe kod nga aplikacioni i autentikimit, dhe çdo qasje në të dhëna të ndjeshme regjistrohet.

Fëmijët

Besa është vetëm për persona mbi 18 vjeç. Nuk pranojmë profile të të miturve dhe fshijmë çdo llogari kur mësojmë se i përket dikujt nën 18 vjeç.

Ndryshimet

Kur e ndryshojmë këtë politikë, publikojmë një version të ri me datën e hyrjes në fuqi dhe ju njoftojmë para se të vlejë.